ଭୁବନେଶ୍ବର:୨୮/୦୩: ଦିନ ପ୍ରାୟ ଗୋଟାଏ। ଲୋୟର ପିଏମ୍ଜି କଂଗ୍ରେସ ସମାବେଶରେ ନେତାମାନେ ଭାଷଣ ଦେଉଥିଲେ। ଏହି ସମୟରେ ସଭାମଞ୍ଚର ପଛ ପାଖର ଚିତ୍ର ବଦଳିଗଲା। ପ୍ରଥମ ବ୍ୟାରିକେଡ୍ ନିକଟରେ କଂଗ୍ରେସ କର୍ମୀ-ପୁଲିସ୍ ମୁହାଁମୁହିଁ ହେଲେ। ଚାଲିଲା ଠେଲାପେଲା। ପ୍ରଥମ ବ୍ୟାରିକେଡ୍ ଭାଙ୍ଗି ଦ୍ବିତୀୟ ବ୍ୟାରିକେଡ୍ ଆଡ଼କୁ ମୁହାଁଇବା ବେଳେ ପୁଲିସ ତା’ର ଉଗ୍ରରୂପ ଦେଖାଇଲା। କର୍ମୀଙ୍କ ଉପରେ ଲାଠି ମାଡ଼ ଆରମ୍ଭ କରିଦେଲା। ଗୋଡ଼େଇ ଗୋଡ଼େଇ କଂଗ୍ରେସ କର୍ମୀଙ୍କୁ ପିଟିଲା। ବିକଳରେ ଯିଏ ଯୁଆଡ଼େ ପାରିଲେ ଦୌଡ଼ିଲେ। ସଭା ନିକଟରେ ଥିବା ଅନ୍ୟ କଂଗ୍ରେସ କର୍ମୀ ଏହି ସମୟରେ ପୁଲିସ ଉପରକୁ ଆକ୍ରମଣ ଆରମ୍ଭ କରିଦେଲେ। ଢେଲାପଥର, ଚେୟାର, ଲାଠି, ପାଣି ବୋତଲ, ଅଣ୍ଡା ଓ ଟମାଟୋ ବର୍ଷା କଲେ। ପୁଲିସ ପାଣି ମାଡ଼ ଆରମ୍ଭ କଲା। ତଥାପି କଂଗ୍ରେସ କର୍ମୀ ବିକ୍ଷୋଭ ସ୍ଥଳ ଛାଡ଼ିଲେନି। ଓଲଟା ପାଣି ମାଡ଼ରେ ଖୁସିରେ ନାଚିବାକୁ ଲାଗିଲେ। ବାଧ୍ୟ ହୋଇ ପୁଲିସ ଲୁହବୁହା ଗ୍ୟାସ ପ୍ରୟୋଗ କରିଥିଲା। ଲୁହବୁହା ଗ୍ୟାସ୍ର କ୍ୟାଟ୍ରିଜ୍ କଂଗ୍ରେସ କର୍ମୀଙ୍କ ଦେହରେ ମାଡ଼ ହେବା ଫଳରେ ସେମାନେ ଆହତ ହୋଇଥିଲେ। ଏମିତି ଭାବେ ଘଣ୍ଟାଏ କାଳ ଲୋୟର ପିଏମ୍ଜି ରଣକ୍ଷେତ୍ର ପାଲଟି ଯାଇଥିଲା। କେତେବେଳେ ବିକ୍ଷୋଭକାରୀ ପୁଲିସ୍ ଆଡ଼କୁ ମାଡ଼ି ଯାଉଥିଲେ ତ କେତେବେଳେ ପୁଲିସ୍ ବିକ୍ଷୋଭକାରୀଙ୍କୁ ମାରିବାକୁ ଗୋଡ଼ାଉଥିଲା। ଧୀରେ ଧୀରେ ଅନ୍ୟ ବରିଷ୍ଠ ନେତୃବର୍ଗ ସେମାନଙ୍କ ସହ ଯୋଗ ଦେଇ ଧାରଣାରେ ବସିଥିଲେ। ଏହି ସମୟରେ କିଛି ମହିଳା କଂଗ୍ରେସ କର୍ମୀଙ୍କୁ ଅସଦାଚରଣ କରାଯାଇଥିବା ଅଭିଯୋଗ ହୋଇଛି। ବିକ୍ଷୋଭସ୍ଥଳରୁ ହଟିବା ପାଇଁ ପୁଲିସ ବୁଝାଇବା ସତ୍ତ୍ବେ ସେମାନେ ଶୁଣି ନ ଥିଲେ। ପରେ ଗିରଫ ନେଇ ମାଜିଷ୍ଟ୍ରେଟ୍ଙ୍କ ନିର୍ଦ୍ଦେଶ ଆସିଥିବା ପୁଲିସ ମାଇକ୍ରେ ଘୋଷଣା କରିଥିଲା। ଆଉ ବିକ୍ଷୋଭ ସ୍ଥଳରୁ ପିସିସି ସଭାପତି ଭକ୍ତଚରଣ ଦାସ, ବରିଷ୍ଠ ନେତା ମହମ୍ମଦ ମୋକିମ୍, ପ୍ରଭାରୀ ଅଜୟ ଲଲ୍ଲୁ ଓ ଅନ୍ୟମାନଙ୍କୁ ଉଠାଇ ନେଇଥିଲା। ସେମାନଙ୍କୁ ଛାଡ଼ି ଦିଆଯାଇଛି। ପରସ୍ପରକୁ ଆକ୍ରମଣ କରିବା ଘଟଣାରେ ଉଭୟ ପକ୍ଷରୁ ଅନେକ ଆହତ ହୋଇଛନ୍ତି। ୫୦ରୁ ଅଧିକ କଂଗ୍ରେସ କର୍ମୀ ଓ ୬ ଜଣ ବରିଷ୍ଠ ପୁଲିସ କର୍ମଚାରୀଙ୍କୁ ମିଶାଇ ୧୭ଜଣ ପୁଲିସ ଆହତ ହୋଇଛନ୍ତି। ଖବର ସଂଗ୍ରହ ପାଇଁ ଉପସ୍ଥିତ ଥିବା ଏକାଧିକ ସାମ୍ବାଦିକ ମଧ୍ୟ ଢେଲାପଥର ମାଡ଼ରୁ ବର୍ତ୍ତି ନାହାନ୍ତି। ସମସ୍ତ ଆହତଙ୍କୁ ଚିକିତ୍ସା ପାଇଁ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରାଯାଇଛି। ଗଣ୍ଡଗୋଳ ଘଟଣାରେ ପୁଲିସ କଂଗ୍ରେସ କର୍ମୀଙ୍କ ବିରୋଧରେ ମାମଲା ରୁଜୁ କରିଛି। ନାରୀ ସୁରକ୍ଷା ଦାବିରେ କଂଗ୍ରେସ ପକ୍ଷରୁ ଆଜି ବିଧାନସଭା ଘେରାଉ କାର୍ଯ୍ୟକ୍ରମ ଥିଲା। ରାଜ୍ୟର ବିଭିନ୍ନ ଜିଲ୍ଲାରୁ ହଜାର ହଜାର କର୍ମୀ ରାଜଧାନୀକୁ ଆସିବାର ଥିବାରୁ ପୁଲିସ ବିକ୍ଷୋଭ ସ୍ଥଳକୁ ଚାରିଆଡ଼ୁ ବ୍ୟାରିକେଡ୍ କରିଥିଲା। ଦିନ ୧୦ଟା ସମୟରେ ରାମ ମନ୍ଦିର ନିକଟରୁ କଂଗ୍ରେସର ଶୋଭାଯାତ୍ରା ଆରମ୍ଭ ହୋଇଥିଲା। ପିସିସି ସଭାପତି ଭକ୍ତଚରଣ ଦାସଙ୍କ ସମେତ ବରିଷ୍ଠ ନେତା ଓ କର୍ମୀ ଶୋଭାଯାତ୍ରାରେ ଆସି ବିକ୍ଷୋଭ ସ୍ଥଳରେ ପହଞ୍ଚିଥିଲେ। ଆଜିର ମଞ୍ଚକୁ କେବଳ ମହିଳା କଂଗ୍ରେସ କର୍ମୀଙ୍କ ପାଇଁ ସଂରକ୍ଷିତ ରଖାଯାଇଥିଲା। ଦଳର ଅନ୍ୟ ପୁରୁଷ ନେତୃବର୍ଗ ସଭା ତଳେ ବସିଥିଲେ। ପୂର୍ବତନ ମନ୍ତ୍ରୀ ସରସ୍ବତୀ ହେମ୍ବ୍ରମ୍ଙ୍କ ପୌରୋହିତ୍ୟରେ ସଭାକାର୍ଯ୍ୟ ଆରମ୍ଭ ହୋଇଥିଲା। ସସ୍ମିତା ବେହେରା କାର୍ଯ୍ୟକ୍ରମକୁ ପରିଚାଳନା କରିଥିଲେ। ଏହି ଅବସରରେ ବରିଷ୍ଠ ନେତୃବର୍ଗ କହିଥିଲେ, ପୂର୍ବର ବିଜେଡି ସରକାର ସମୟରେ ନାରୀ ନିର୍ଯାତନାର ଯେଉଁ ପରିସ୍ଥିତି ଥିଲା, ଏବର ବିଜେପି ସରକାର ସମୟରେ ତାହା ଆହୁରି ବଢ଼ିଛି। ବିଧାନସଭାରେ ଏକ ଗୃହ କମିଟି ଗଠନ କରିବା ପାଇଁ କଂଗ୍ରେସ ଦାବି କରି ଆସୁଥିବାବେଳେ ସରକାର ଶୁଣୁ ନାହାନ୍ତି। ଓଲଟା ଦଳର ୧୪ ଜଣ ବିଧାୟକଙ୍କୁ ନିଲମ୍ବିତ କରାଯାଇଛି। ଆଗାମୀ ଦିନରେ ଏହାକୁ ନେଇ ରାଜରାସ୍ତାରେ ଲଢ଼େଇ କରାଯିବ। ମହିଳା କଂଗ୍ରେସ ନେତ୍ରୀମାନେ ଜନସାଧାରଣଙ୍କୁ ସଚେତନ କରନ୍ତୁ। ପିସିସି ସଭାପତି ଶ୍ରୀ ଦାସ କହିଥିଲେ, ଆଗାମୀ ଦିନରେ ରାଜ୍ୟବ୍ୟାପୀ ନାରୀ ନ୍ୟାୟ ସତ୍ୟାଗ୍ରହ ଅନୁଷ୍ଠିତ ହେବ। ୩୦ ହଜାର ଲୋକ ଏକାଠି ହେବା ନେଇ ଦଳ ଆକଳନ କରିଥିବା ସେ କହିଛନ୍ତି। ପରେ ବରିଷ୍ଠ କଂଗ୍ରେସ ନେତୃବର୍ଗ କ୍ୟାପିଟାଲ ହସ୍ପିଟାଲକୁ ଯାଇ ଆହତ କଂଗ୍ରେସ କର୍ମୀଙ୍କୁ ଭେଟିଥିଲେ। ଅନ୍ୟମାନଙ୍କ ମଧ୍ୟରେ ପୂର୍ବତନ କଂଗ୍ରେସ ସଭାପତି ନିରଞ୍ଜନ ପଟ୍ଟନାୟକ, ଶରତ ପଟ୍ଟନାୟକ, ପ୍ରସାଦ ହରିଚନ୍ଦନ, ଜୟଦେବ ଜେନା, ବିଧାୟକ ଦଳ ନେତା ରାମଚନ୍ଦ୍ର କାଡ଼ାମ, ବିଧାୟକ ତାରାପ୍ରସାଦ ବାହିନୀପତି, ରମେଶ ଜେନା, ରାଜ ଏକ୍କା, ଦାଶରଥୀ ଗମାଙ୍ଗୋ, ପବିତ୍ର ସାଉଁନ୍ତା, ମଙ୍ଗୁ ଖିଲ, ସାଗର ଦାସ, ସୋଫିଆ ଫିର୍ଦୋସ,ସତ୍ୟଜିତ ଗମାଙ୍ଗୋ, ପ୍ରଫୁଲ୍ଲ ପ୍ରଧାନ, କାଡ୍ରାକ ଆପାଲସ୍ବାମୀ, ସାଂସଦ ସପ୍ତଗିରି ଉଲାକା, ରୋଜାଲିନା ତିର୍କୀ, ରାମଚନ୍ଦ୍ର ଖୁଣ୍ଟିଆ, ଶ୍ରୀକାନ୍ତ ଜେନା, ସୁରେଶ ରାଉତରାୟ, ଶରତ ରାଉତ, ଜାନକୀ ବଲ୍ଲଭ ପଟ୍ଟନାୟକ, ମହମ୍ମଦ ମୋକିମ୍, ଅନନ୍ତ ସେଠୀ, ଅମର ପ୍ରଧାନ, ନବଜ୍ୟୋତି ପଟ୍ଟନାୟକ, ଶିବାନନ୍ଦ ରାୟ, ପୃଥ୍ବୀବଲ୍ଲଭ ପଟ୍ଟନାୟକ, ବିଶ୍ବଜିତ ଦାସ, ମୀନାକ୍ଷୀ ବାହିନୀପତି, ବନ୍ଦିତା ପରିଡ଼ା, ସୁଶୀଳା ତିରିଆ, ସୋନାଲି ସାହୁ, ପ୍ରଣତି ମିଶ୍ର, ଗୀତାଞ୍ଜଳି ମହାନ୍ତି, ମଧୁସ୍ମିତା ପଣ୍ଡା, ଶାନ୍ତନୁ ସାହୁ, ମାନସ କର, ରଜନୀ ମହାନ୍ତି, ରଞ୍ଜିତ ଦାସ, ୟାସିର ନୱାଜ, ଉଦିତ ପ୍ରଧାନ, ଶୁଭେନ୍ଦୁ ମହାନ୍ତି, ସମୀର ରାଉତରାୟ, ଅମୀୟ ପାଣ୍ଡବ, ଲଲାଟେନ୍ଦୁ ମହାପାତ୍ର ଓ ବହୁ କଂଗ୍ରେସ ନେତା ଯୋଗ ଦେଇଥିଲେ।
