ରାଉରକେଲା:୨୫/୦୩: ରାଉରକେଲା ସ୍ମାର୍ଟ ସିଟି ଲିମିଟେଡ୍ର ୨୯ତମ ନିର୍ଦ୍ଦେଶକ ମଣ୍ଡଳୀ ବୈଠକ ଭୁବନେଶ୍ଵରସ୍ଥ ଲୋକସେବା ଭବନଠାରେ ଅନୁଷ୍ଠିତ ହୋଇଯାଇଛି। ଏଥିରେ ଉନ୍ନୟନ କମିସନର ଅନୁ ଗର୍ଗ ଏବଂ ଗୃହ ଓ ନଗର ଉନ୍ନୟନ ବିଭାଗର ପ୍ରମୁଖ ସଚିବ ଉଷା ପାଢୀ ଅଧ୍ୟକ୍ଷତା କରିଥିଲେ। ବୈଠକରେ ସହରରେ କାର୍ଯ୍ୟକାରୀ କରାଯାଇଥିବା ବିଭିନ୍ନ ବିକାଶମୂଳକ କାର୍ଯ୍ୟ ତଥା ନିର୍ମାଣାଧୀନ ପ୍ରକଳ୍ପଗୁଡ଼ିକର ଅଗ୍ରଗତି ସମୀକ୍ଷା କରିଥିଲେ। ପ୍ରକଳ୍ପ କାର୍ଯ୍ୟରେ ସୃଷ୍ଟି ସମସ୍ୟାକୁ ଦୂର ନିର୍ଦ୍ଧାରିତ ସମୟ ସୀମା ମଧ୍ୟରେ ଶେଷ କରିବାକୁ ନିର୍ଦ୍ଦେଶ ଦେଇଥିଲେ। ବିଶେଷକରି ‘ରାଉରକେଲା ୱାନ୍’ ଠାରେ ନିର୍ମାଣାଧୀନ ସମନ୍ଵିତ ନିର୍ଦ୍ଦେଶ ଓ ନିୟନ୍ତ୍ରଣ କକ୍ଷ, ଆଦିବାସୀ ସଂଗ୍ରହାଳୟକୁ ଜୁନ୍ ସୁଦ୍ଧା ସଂପନ୍ନ କରିବାକୁ ଲକ୍ଷ୍ୟ ରଖାଯାଇଛି। କୋଏଲ ନଗରଠାରେ ଚାଲିଥିବା ରିକ୍ରିଏସନାଲ ପାର୍କ୍ର ଅଗ୍ରଗତି ସମୀକ୍ଷା କରିବା ସହ ବେଦବ୍ୟାସ ପୀଠର ଉନ୍ନତିକରଣ ଉପରେ ଆଲୋଚନା କରାଯାଇଥିଲା। ବୈଠକରେ ବର୍ଷାଜଳ ଡ୍ରେନେଜ୍ ବ୍ୟବସ୍ଥା, ବିର୍ସା ଛକରେ ଥିବା ନୂତନ ବସଷ୍ଟାଣ୍ଡ୍, ଟିସ୍କୋ ପୋଖରୀର ପୁନଃରୁଦ୍ଧାର କାର୍ଯ୍ୟକୁ ଅନୁମୋଦିତ ହୋଇଛି। ଉଲ୍ଲେଖଯୋଗ୍ୟ, ଦୟାନନ୍ଦ ନଗର, ପି.କେ. ଦାସ କଲୋନୀ, ବୁରୁଟୋଲା, ଜଗନ୍ନାଥ କଲୋନୀରେ ବର୍ଷାଦିନେ ଜଳ ନିଷ୍କାସନର ସ୍ଥାୟୀ ସମାଧାନ ପାଇଁ ଡ୍ରେନେଜ୍ ସିଷ୍ଟମ କାର୍ଯ୍ୟକାରୀ କରାଯିବ। ସେହିଭଳି ଟିସ୍କୋ ପୋଖରୀର ସୌନ୍ଦର୍ଯ୍ୟକରଣ କରି ଏହାକୁ ଏକ ପର୍ଯ୍ୟଟନ ସ୍ଥଳୀରେ ପରିଣତ କରାଯିବ। ଏଠାରେ ଜଙ୍ଗଲ ଟ୍ରେଲ୍, ଫୁଟ୍ ଓଭର ବ୍ରିଜ୍, ଫୁଡ୍ କୋର୍ଟ ଆଦି ନିର୍ମାଣ ହେବ। ଏତଦ୍ବ୍ୟତୀତ କଳିଙ୍ଗ ବିହାର ସାପ୍ତାହିକ ହାଟର ବ୍ୟବସାୟୀଙ୍କ ପାଇଁ ଟିସ୍କୋଠାରେ ୪ ଶହ ଜଣ ବ୍ୟବସାୟୀଙ୍କ ପାଇଁ ପିଣ୍ଡି ନିର୍ମାଣ କରାଯିବ। ବୈଠକରେ ରାଉରକେଲା ସ୍ମାର୍ଟ ସିଟିର କାର୍ଯ୍ୟନିର୍ବାହୀ ଅଧିକାରୀ ଆଶୁତୋଷ କୁଲକର୍ଣ୍ଣିଙ୍କ ସହ ଅନ୍ୟ ବିଭାଗୀୟ ଅଧିକାରୀ ଉପସ୍ଥିତଥିଲେ।
