ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍ ୨୦୨୧)ର ନୂତନ କାର୍ଯ୍ୟସୂଚୀ ଓ ଆଗାମୀ ଟି-୨୦ ବିଶ୍ୱକପ୍ ସହ ଜଡିତ ଶନିବାର ଅନଲାଇନରେ ଆୟୋଜିତ ହେବାକୁ ଥିବା ସ୍ୱତନ୍ତ୍ର ସାଧାରଣ ସଭାରେ ବିସିସିଆଇ ଅନେକ ପ୍ରମୁଖ ପ୍ରସଙ୍ଗ ଉପରେ ଆଲୋଚନା କରିବ।
ୟୁପିରେ ୧୫ ସେପ୍ଟେମ୍ବରରୁ ୧୫ ଅକ୍ଟୋବର ପର୍ଯ୍ୟନ୍ତ ଆଇପିଏଲର ୧୪ ତମ ସିଜନର ଅବଶିଷ୍ଟ ମ୍ୟାଚ୍ ଆୟୋଜନ କରିବାକୁ ବୋର୍ଡ ନିଷ୍ପତ୍ତି ନେଇପାରେ।
ବୋର୍ଡ ନିଜେ ଭାରତରେ ଟି -୨୦ ବିଶ୍ୱକପ ଆୟୋଜନ କରିବାକୁ ଚାହୁଁଛି ଏବଂ ଜୁନ ୧ ରେ ଆଇସିସି (ଆନ୍ତର୍ଜାତୀୟ କ୍ରିକେଟ୍ ପରିଷଦ) ବୋର୍ଡ ବୈଠକରେ ଟୁର୍ଣ୍ଣାମେଣ୍ଟ ସମ୍ବନ୍ଧରେ କୌଣସି ନିଷ୍ପତ୍ତି ନେବା ପୂର୍ବରୁ ଭାରତରେ କରୋନାର ସ୍ଥିତି ସମୀକ୍ଷା କରିବାକୁ ଚାହୁଁଛି ବୋଲି ଜଣାପଡିଛି।
ଶନିବାର ମୁମ୍ବାଇରୁ ଏହି ବୈଠକରେ ବିସିସିଆଇ ସଭାପତି ସୌରଭ ଗାଙ୍ଗୁଲି ଅଧ୍ୟକ୍ଷତା କରିବେ ବୋଲି ଜଣାପଡିଛି। ଆଇପିଏଲ୍ ସେପ୍ଟେମ୍ବର ୧୮ରୁ ୨୦ ମଧ୍ୟରେ ପୁନଃଆରମ୍ଭ ହେବ ଏବଂ ଅକ୍ଟୋବର ୧୦ ରେ ଶେଷ ହେବ ବୋଲି ଆଶା କରାଯାଉଛି । ୟୁଏଇ ଆବୁଧାବି, ଦୁବାଇ ଏବଂ ଶାରଜା ଠାରେ ତିନୋଟି ସ୍ଥାନରେ ମ୍ୟାଚ୍ ଆୟୋଜନ କରିବ।
ବିଶ୍ୱକପ୍ ପାଇଁ ବିସିସିଆଇ ୯ଟି ଷ୍ଟାଡିୟମ୍ ଚୟନ କରିଛି । ୟୁଏଇକୁ ବିଶ୍ୱକପ୍ ସ୍ଥାନାନ୍ତର ହେଲେ ମୋଟ୍ ୩ଟି ଷ୍ଟାଡିୟମ୍(ସାରଜା, ଆବୁଧାବି ଓ ଦୁବାଇ)ରେ ସମସ୍ତ ମ୍ୟାଚ୍ ଖେଳାଯିବ । ଭାରତରେ ମଧ୍ୟ ମୁମ୍ବାଇ-ଅହମ୍ମଦାବାଦ ଭିତରେ ବିଶ୍ୱକପ୍କୁ ସୀମିତ ରଖାଯାଇପାରିବ । ମହାରାଷ୍ଟ୍ରରେ ୱାଙ୍ଖଡ଼େ, ପୁନେ(ଏମ୍ସିଏ) ଓ ବ୍ରାବୋର୍ଣ୍ଣ ଷ୍ଟାଡିୟମ୍ ରହିଛି । ଅହମ୍ମଦାବାଦରେ ନମୋ ଷ୍ଟାଡିୟମ୍ ପ୍ରସ୍ତୁତ ରଖାଯାଇଛି । ଏହା ବାଦ୍ ଖେଳାଳିମାନଙ୍କ ଅଭ୍ୟାସ ପାଇଁ ମୁମ୍ବାଇରେ ପର୍ଯ୍ୟାପ୍ତ ସୁବିଧା ସୁଯୋଗ ରହିଛି ।
