ନୂଆଦିଲ୍ଲୀ:୧୧/୦୫: ୭୦ ଲକ୍ଷ ଟଙ୍କା ଲାଞ୍ଚ ନେବା ମାମଲାରେ ହାଇଦ୍ରାବାଦ ଆୟକର କମିଶନର ଜୀବନ ଲାଲ ଲାଭିଡିଆ ଏବଂ ଅନ୍ୟ ଚାରି ଜଣଙ୍କୁ ସିବିଆଇ ଗିରଫ କରିଛି। ପାଲୋନଜି ଗ୍ରୁପ୍ ସପକ୍ଷରେ ଏକ ଆବେଦନର ସମାଧାନ ପାଇଁ ତାଙ୍କ ଉପରେ ୭୦ ଲକ୍ଷ ଟଙ୍କା ଲାଞ୍ଚ ନେଇଥିବା ଅଭିଯୋଗ ହୋଇଛି। ତଦନ୍ତକାରୀ ସଂସ୍ଥା ମୁମ୍ବାଇ, ହାଇଦ୍ରାବାଦ, ଖମ୍ମମ୍, ବିଶାଖାପାଟଣା ଏବଂ ନୂଆଦିଲ୍ଲୀର ୧୮ଟି ସ୍ଥାନରେ ମଧ୍ୟ ଚଢାଉ କରିଥିଲା। ଲାଞ୍ଚ ପରିମାଣ ବ୍ୟତୀତ, ପ୍ରାୟ ୬୯ ଲକ୍ଷ ଟଙ୍କା ନଗଦ ଜବତ କରାଯାଇଥିଲା। ସମସ୍ତ ଅଭିଯୁକ୍ତଙ୍କୁ ମୁମ୍ବାଇ, ଆନ୍ଧ୍ରପ୍ରଦେଶ ଏବଂ ତେଲେଙ୍ଗାନାର ସ୍ୱତନ୍ତ୍ର ସିବିଆଇ କୋର୍ଟରେ ହାଜର କରାଯାଇଥିଲା। ଏହି ମାମଲାରେ ଶାପୁରଜୀ ପାଲୋଞ୍ଜୀ ଗ୍ରୁପ୍ ଡେପୁଟି ଜେନେରାଲ୍ ମ୍ୟାନେଜର (ଟିକସ) ବିରଳ କଣ୍ଟିଲାଲ୍ ମେହେଟ୍ଟା, ସାଇରାମ ପଲିସେଟ୍ଟି, ନାଟା ଭେରା ନାଗା ଶ୍ରୀରାମ ଗୋପାଳ ଏବଂ ସାଜିଦା ମଜହର ହୁସେନ୍ ଶାହାଙ୍କୁ ମଧ୍ୟ ଗିରଫ କରାଯାଇଥିଲା। ଗିରଫଦାରୀ ସମ୍ପର୍କରେ ଶାପୁରଜୀ ପାଲୋନଜୀ ଗ୍ରୁପ୍ ପକ୍ଷରୁ କୌଣସି ପ୍ରତିକ୍ରିୟା ମିଳିନାହିଁ। ସିବିଆଇ ଅନୁଯାୟୀ, ଶାହା ଲାଭିଡିଆଙ୍କୁ ଲାଞ୍ଚ ଦେଉଥିଲେ ବୋଲି ଅଭିଯୋଗ ହୋଇଛି। ଲାଭିଡିଆ ହାଇଦ୍ରାବାଦର ପ୍ରିନ୍ସିପାଲ ଚିଫ୍ କମିଶନର ଅଫ୍ ଇନକମ ଟ୍ୟାକ୍ସଙ୍କ କାର୍ଯ୍ୟାଳୟ ଅଧୀନରେ ଇନକମ ଟ୍ୟାକ୍ସ କମିଶନରର ଅତିରିକ୍ତ ଦାୟିତ୍ୱ ମଧ୍ୟ ତୁଲାଉଥିଲେ। ସିବିଆଇ ଏକ ବିବୃତ୍ତିରେ କହିଛି ଯେ ଲାଭିଡିଆ, ମଧ୍ୟସ୍ଥିମାନଙ୍କ ସହ ମିଶି, ଘରୋଇ କମ୍ପାନୀମାନଙ୍କ ସପକ୍ଷରେ ନିଷ୍ପତ୍ତି ନେବା ବଦଳରେ ଲାଞ୍ଚ ନେଉଥିଲା। ତାଙ୍କର ଏପରି ଅନେକ ଆବେଦନ ବିଚାରାଧୀନ ଥିଲା। ଏହି ଘଟଣା ଜଣାପଡ଼ିବା ପରେ, ତାଙ୍କୁ ଧରିବାକୁ ଏକ ଜାଲ ବିଛାଯାଇଥିଲା ଏବଂ ୭୦ ଲକ୍ଷ ଟଙ୍କା ଲାଞ୍ଚ ଗ୍ରହଣ କରୁଥିବା ବେଳେ ଜଣେ ଅଭିଯୁକ୍ତଙ୍କୁ ଧରାଯାଇଥିଲା। ଏହା ପରେ, ଲାଭିଡିଆ ଏବଂ ତାଙ୍କ ସହଯୋଗୀମାନଙ୍କୁ ହାଇଦ୍ରାବାଦରୁ ଗିରଫ କରାଯାଇଥିଲା ବୋଲି ସିବିଆଇ ମୁଖପାତ୍ର କହିଛନ୍ତି।
