୨୬ ଜାନୁଆରୀ ଅର୍ଥାତ ଗଣତନ୍ତ୍ର ଦିବସରେ ଦିଲ୍ଲୀରେ କୃଷକମାନେ କରିଥିବା ଟ୍ରାକ୍ଟର ରାଲି ସମୟରେ ହୋଇଥିବା ହିଂସାକୁ ନେଇ ଆଜି ସୁପ୍ରିମ୍ କୋର୍ଟ ଶୁଣାଣି କରିଛନ୍ତି । ଶୁଣାଣି ସମୟରେ କୋର୍ଟ ଏହି ମାମଲାରେ ମୁଣ୍ଡ ପୁରାଇବେ ନାହିଁ ବୋଲି ସିଧା ସିଧା କହିଛନ୍ତି । ପ୍ରଧାନ ବିଚାରପତି ଜଷ୍ଟିସ୍ ଏସ୍.ଏ. ବୋବଡ଼େ ଏ ନେଇ କହିଥିଲେ ଯେ, ସରକାର ଏହି ମାମଲାକୁ ଦେଖୁଛନ୍ତି । ତେଣୁ କୋର୍ଟ କିଛି କରିପାରିବ ନାହିଁ ଏବଂ ଆଇନ୍ ତା ବାଟରେ ଯିବ ବୋଲି ସେ କହିଛନ୍ତି ।
ଶୁଣାଣି ସମୟରେ ପ୍ରଧାନ ବିଚାରପତି ପୁଣି କହିଛନ୍ତି, ପ୍ରଧାନ ମନ୍ତ୍ରୀ ନରେନ୍ଦ୍ର ମୋଦିଙ୍କର ବୟାନ ସେ ଦେଖିଛନ୍ତି । ଏହି ମାମଲାକୁ ଗମ୍ଭିରତାର ସହ ନିଆଯାଉଛି । କାନୁନ୍ ତା କାମ କରିବ । ତେଣୁ କୋର୍ଟ ଏଥିରେ ଦଖଲ୍ ଦେବ ନାହିଁ । ମାମଲାର ବିଚାର ପାଇଁ କେନ୍ଦ୍ର ସରକାରଙ୍କୁ ଜଣାଇବାକୁ ଆବେଦନକାରୀଙ୍କୁ କୋର୍ଟ କହିଛନ୍ତି ।
ଏହି ମାମଲାର ବିଚାର ପାଇଁ ସୁପ୍ରିମ୍ କୋର୍ଟରେ ୫ଟି ଯାଚିକା ଦାଖଲ କରାଯାଇଥିଲା କିଛି ଯାଚିକାରେ ଅବସରପ୍ରାପ୍ତ ବିଚାରପତିଙ୍କ ଖଣ୍ଡପୀଠ ଗଠନ କରାଯିବା ନେଇ ଦର୍ଶାଯାଇଥିଲା । ଆଉକିଛି ଏହି ଘଟଣାରେ ଅନ୍ତରାଷ୍ଟ୍ରୀୟ ଲିଙ୍କ୍ ଥିବାର ଅଭିଯୋଗ କରି ମାମଲାକୁ ଏନ୍ଆଇଏକୁ ହସ୍ତାନ୍ତର କରିବା ପାଇଁ କୋର୍ଟଙ୍କୁ ଜଣାଇଥିଲେ ।
