ନୟାଗଡରେ କୁଖ୍ୟାତ ଡକାୟତ ପାଙ୍ଗା ଓରଫ ପ୍ରଭାତ ରାଉତର ମୃତ୍ୟୁ । ଗାଁରେ ଡକାୟତି ଉଦ୍ୟମ ବେଳେ ପିଟି ପିଟି ମାରିଦେଲେ ଗାଁ ଲୋକେ ! ଏପରି ଅଭାବନୀୟ ଘଟଣା ଘଟିଛି ନୟାଗଡ ଜିଲ୍ଲାର ବାରବାଟୀ ଗାଁରେ ।
ସୂଚନାନୁସାରେ, ବାରବାଟୀ ଗାଁରେ ଡକାୟତି ଉଦ୍ୟମ ବେଳେ କାବୁ କରିଥିଲେ ଗ୍ରାମବାସୀ । ସେଠାରେ ଗାଁ ଲୋକେ ପିଟି ପିଟି ପାଙ୍ଗାକୁ ଲହୁଲୁହାଣ କରିଥିଲେ । ଖବର ପାଇ ସଦର ଥାନା ପୋଲିସ ଘଟଣାସ୍ଥଳରେ ପହଁଞ୍ଚିଥିଲା । ଗୁରୁତର ଅବସ୍ଥାରେ ପାଙ୍ଗାକୁ ଗାଁ ଲୋକଙ୍କ କବଳରୁ ଉଦ୍ଧାର କରି ମେଡିକାଲ ନେଇଥିଲା ପୋଲିସ । ସେଠାରେ ଡାକ୍ତର ତାକୁ ମୃତ ଘୋଷଣା କରିଛନ୍ତି । ଏସମ୍ପର୍କରେ ଅଧିକ ତଦନ୍ତ କରୁଛି ପୋଲିସ । ପାଙ୍ଗା ଗ୍ୟାଙ୍ଗ ଗଠନ କରି ନୟାଗଡ ଜିଲ୍ଲାରେ ଆତଙ୍କ ଖେଳାଇଥିଲା । କୁଖ୍ୟାତ ଡକାୟତ ପାଙ୍ଗା ନାଁରେ ଆଗରୁ ଥାନାରେ ଅନେକ ମାମଲା ରହିଛି ।
