କୋଲକାତାର ବଡ଼ବଜାରସ୍ଥିତ ଷ୍ଟ୍ରେଣ୍ଡ ରୋଡ଼ରେ ଥିବା ଏକ ବହୁତଳ କୋଠାରେ ଭୟାବହ ଅଗ୍ନିକାଣ୍ଡ ଯୋଗୁଁ ଦମକଳ ବାହିନୀର କର୍ମଚାରୀଙ୍କ ସମେତ ୯ ଜଣଙ୍କର ମୃତ୍ୟୁ ଘଟଣାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗଭୀର ଶୋକ ଜଣାଇଛନ୍ତି । ପ୍ରଧାନମନ୍ତ୍ରୀ ମୋଦୀ ଟୁଇଟ କରି ଶୋକସନ୍ତପ୍ତ ପରିବାରକୁ ସମବେଦନା ଜଣାଇଛନ୍ତି । ହେସିପରି ଅଗ୍ନିକାଣ୍ଡରେ ଆହତ ହୋଇ ହସ୍ପିଟାଲରେ ଚିକିତ୍ସିତ ହେଉଥିବା ଲୋକଙ୍କର ଆଶୁ ଆରୋଗ୍ୟ କାମନା କରିଛନ୍ତି ।
ସୂଚନାଯୋଗ୍ୟ ୧୭ ମହଲା ବିଶିଷ୍ଟ କୋଠାରେ ଗତକାଲି ସନ୍ଧ୍ୟା ସମୟରେ ନିଆଁ ଲାଗିଥିଲା । କୋଠାର ୧୨ ମହଲାରେ ନିଆଁ ଲାଗିଥିଲା । ପୋଲିସ କହିଛି ଯେ, ଦମକଳ ବାହିନୀର ୮ଟି ଗାଡ଼ି ନିଆଁ ଲିଭା କାମରେ ନିୟୋଜିତ ହୋଇଥିଲା । କୋଠାକୁ ଖାଲି କରି ଦିଆଯାଇଛି । ସେହିପରି ସଂପୃକ୍ତ ଅଂଚଳରେ ଲୋକଙ୍କର ଯାତାୟତ ମଧ୍ୟ ବନ୍ଦ କରି ଦିଆଯାଇଥିଲା ।
ଅଗ୍ନି ଓ ଜରୁରୀକାଳୀନ ସେବାର ଅଧିକାରୀ ସୁଜିତ ବୋସ କହିଛନ୍ତି ଯେ, ଦୁର୍ଘଟଣାରେ ଏପର୍ଯ୍ୟନ୍ତ ୯ ଜଣଙ୍କର ମୃତ୍ୟୁ ହୋଇଛି । ଏଥିରେ ୪ ଜଣ ଦମକଳ ବାହିନୀର କର୍ମଚାରୀ ଥିଲେ ବୋଲି କୁହାଯାଉଛି । କିଛି ଲୋକ ଆହତ ହୋଇଛନ୍ତି । ଆହତମାନଙ୍କୁ ଉଦ୍ଧାର କରାଯାଇ ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଛି । ପଶ୍ଚିମବଙ୍ଗ ସରକାର ମୃତକଙ୍କ ପରିବାରକୁ ୧୦ ଲକ୍ଷ ଟଙ୍କା ଲେଖାଏଁ ଅନୁକମ୍ପାମୂଳକ ରାଶି ଦେବାକୁ ଘୋଷଣା କରିଛନ୍ତି ।
