ଫେବୃଆରୀ ୧୮ ତାରିଖରେ ହେବାକୁ ଥିବା ଆଇପିଏଲ ନିଲାମରେ କ୍ରିକେଟର ଭଗବାନ ସଚ୍ଚିନ ତେନ୍ଦୁଲକରଙ୍କ ପୁତ୍ର ଅର୍ଜୁନ ତେନ୍ଦୁଲକରଙ୍କ ନାମ ସାମିଲ କରାଯାଇଛି । ଏହି ନିଲାମରେ ଅର୍ଜୁନଙ୍କ ବ୍ରେସ ପ୍ରାଇସ ୨୦ ଲକ୍ଷ ରହିଛି । ଚଳିତ ବର୍ଷ ସୟଦ ମୁସ୍ତାକ ଅଲ୍ଲୀ ଟି-୨୦ ଟ୍ରଫିରେ ମୁମ୍ବାଇ ପକ୍ଷରୁ ଡେବ୍ୟୁ କରିଥିଲେ ଅର୍ଜୁନ । ପୂର୍ବରୁ ମୁମ୍ବାଇ ଇଣ୍ଡିଆନ୍ସ ଟିମ ସହ ତାଙ୍କୁ ଅଭ୍ୟାସ କରୁଥିବାର ଦେଖିବାକୁ ମିଳିଥିଲା । ସେହିପରି ଆଇପିଏଲରେ ସ୍ପଟ ଫିକ୍ସି ଯୋଗୁ ଦୀର୍ଘ ୭ ବର୍ଷ ଧରି କ୍ରିକେଟରୁ ଦୂରରେ ରହିଥିବା କେରଳ ଫାଷ୍ଟ ବୋଲର ଏସ.ଶ୍ରୀଶାନ୍ତ ମଧ୍ୟ ଏଥର ନିଲାମ ପକ୍ରିୟାରେ ସାମିଲ ହୋଇଛନ୍ତି । ତାଙ୍କର ବେସ ପ୍ରାଇସ ୭୫ ଲକ୍ଷ ରହିଛି । ଅଷ୍ଟ୍ରେଲିଆ ଫାଷ୍ଟ ବୋଲର ମିଚେଲ ଷ୍ଟାର୍କ ଏହି ବର୍ଷ ମଧ୍ୟ ଆଇପିଏଲ ନିଲାମରେ ସାମିଲ ହୋଇନାହାନ୍ତି । ଚଳିତ ବର୍ଷ ଆଇପିଏଲ ନିଲାମ ନିମନ୍ତେ ପୂର୍ବତନ ଭାରତୀୟ ସ୍ପିନର ହରଭଜନ ସିଂ, କେଦାର ଯାଦବ, ଷ୍ଟିଭ ସ୍ମିଥ, ମାର୍କ ଉଡ , ଗ୍ଲେନ ମ୍ୟାକୱେଲ ଆଦି ଖେଳାଳିଙ୍କ ବେସ ପ୍ରାଇସ ୨ କୋଟି ରହିଛି । ସେହିପରି ଭାରତୀୟ ଟେଷ୍ଟ ବ୍ୟାଟସମାନ ହନୁମାନ ବିହାରୀଙ୍କ ବେସ ପ୍ରାଇସ ଏକ କୋଟି ରହିଥିବା ବେଳେ ଚେତେଶ୍ୱର ପୂଜାରାଙ୍କ ବେସ ପ୍ରାଇସ ୫୦ ଲକ୍ଷ ରହିଛି । ଚଲିତ ବର୍ଷ ଆଇପିଏଲ ଅକ୍ସନରେ ୧୦୯୭ ଖେଳାଳି ସାମିଲ ହୋଇଛନ୍ତି । ଯେଉଁଥିରେ ୮୧୪ ଜଣ ଭାରତୀୟ ଖେଳାଳି ରହିଥିବା ବେଳେ ୨୮୩ ଜଣ ବିଦେଶୀ ଖେଳାଳି ରହିଛନ୍ତି ।
